Mae Mesur y Gymraeg yn dweud bod rhaid i'r Llywodraeth gymryd 'sylw dyladwy' o gyngor ysgrifenedig y Comisiynydd, ond, gan iddynt anwybyddu'r iaith yn y Bil, gallai'r Bil gael ei ddiddymu mewn her gyfreithiol. Mae'r her bosib yn dilyn llythyr agored gan draean o arweinwyr cyngor sir Cymru yn galw am newidiadau sylweddol i'r Bil oherwydd ei effaith ar yr iaith ac ar ddemocratiaeth leol. 

Wrth sôn am y ffaith bod y Gymdeithas wedi cymryd cyngor cyfreithiol ar y mater, meddai Jamie Bevan, Cadeirydd Cymdeithas yr Iaith Gymraeg: "Nid ar chwarae bach mae rhywun yn ystyried cymryd y math yma o gam, ond mae'r Llywodraeth wedi cael sawl cyfle i wrando ar gyngor arbenigol y Comisiynydd a'i weithredu, ac wedi gwrthod pob tro. Rydyn ni dal yn obeithiol y byddan nhw'n newid eu meddwl yn dilyn y gwrth-wynebiad ffyrnig gan arweinwyr cynghorau ac eraill. Mae’r cyngor rydyn ni wedi derbyn yn galonogol, ac mae na siawns gref bod y Llywodraeth wedi rhedeg proses wallus."  

Ysgrifennodd Meri Huws, Comisiynydd y Gymraeg, at y Llywodraeth fis Chwefror eleni ac y llynedd gyda chyngor ynglŷn â'r Bil Cynllunio, gan dynnu sylw at wendidau'r ac anghysonderau'r drefn bresennol o ran yr iaith, ac argymhellodd pedwar gwelliant penodol i fil cynllunio'r Llywodraeth. Er gwaethaf addewid y Prif Weinidog, Carwyn Jones, mewn dogfen polisi a gyhoeddwyd fis Mehefin, i ystyried 'pob cam ymarferol ar gyfer atgyfnerthu’r Gymraeg o fewn y system gynllunio', doedd y Bil Cynllunio a gyhoeddwyd fis Hydref ddim yn adlewyrchu cyngor y Comisiynydd.