Mae myfyrwyr Cell Pantycelyn Aberystwyth yn siomedig gyda gwasanaethau Cymraeg Morrisons wedi iddyn nhw gynnal arolwg yn siop Aberystwyth.

Mae'r arolwg yn rhan o ymgyrch genedlaethol gan Gymdeithas yr Iaith sydd yn gofyn i bobl ddweud y byddan nhw'n penderfynu peidio siopa yn Morrisons o fis Rhagfyr ymlaen, nes i'r siop roi chwarae teg i'r Gymraeg.

Wrth wneud yr arolwg fe wnaethon nhw weld mai dim ond rhai o arwyddion parhaol y siop oedd yn ddwyieithog, a bod arwyddion dros-dro a thaflenni yn uniaith Saesneg. Er bod rhai aelodau staff yn siarad Cymraeg doedden nhw ddim yn cael eu hannog i wisgo bathodyn i ddangos hynny; ac er bod peiriannau hunan-wasanaeth yn Gymraeg mae'n rhaid chwilio am y botwm Cymraeg – ac mae cyfarwyddiadau defnyddio'r peiriannau yn Saesneg.

Oherwydd eu siom mae'r gell wedi penderfynu rhoi cynnig gerbron cyfarfod cyffredinol Undeb Myfyrwyr Cymraeg Aberystwyth ddydd Llun y 6ed o Hydref fod yr undeb yn cefnogi ymgyrch Cymdeithas yr Iaith.

Bydd y myfyrwyr hefyd yn mynd ati i drefnu stondinau tu fas i'r siop i gasglu enwau ar gyfer y boicot.

Dyma alwadau Cymdeithas yr Iaith i Morrisons:

1) Sicrhau bod pob arwydd yng Nghymru yn ddwyieithog;

2) Polisi Cyflogaeth ac Ymgyrch Recriwtio fydd yn sicrhau digon o staff sy'n medru ymdrin â chwsmeriaid yn y Gymraeg ym mhob siop yng Nghymru;

3) labeli dwyieithog clir ar holl gynnyrch brand Morrisons;

4) deunydd hyrwyddo a marchnata dwyieithog;

5) cyhoeddiadau uchelseinyddion dwyieithog yn holl siopau Cymru.